म फुर्सदमा छु (गजल ८५)

बगरका ढुंगा टार्छु, म फुर्सदमा छु ।
हिउँदमा बाढी बार्छु, म फुर्सदमा छु ।।

काम गर्ने कोही यता भेटिएलान् कि ।
देश बनाउने बात मार्छु, म फुर्सदमा छु ।।

ढिलो गरे पक्का हुन्छ हतारमा के भर ।
कामकाज पर सार्छु, म फुर्सदमा छु ।।

ढुंगा ढुंगा जुटे पहाड, जुधेमा धूलो ।
धूलो माटो नै बढार्छु, म फुर्सदमा छु ।।

फलको आश नगर भनि 'गीता'ले भन्यो । 
जित्न बाँकी सबै हार्छु, म फुर्सदमा छु ।।

'एकतारे' सँधै मिठो कहाँ होला र? ।
चुप् लाग् भनि म हकार्छु, म फुर्सदमा छु ।।