चलिरहेको जिन्दगी (कविता)

मेरो फेसबुकको दश बीस स्टेटस
टुईटरमा भ'को देश बनाउने बहस
अफिसमा बिजी भै छुटेको फोनकल
छुट्यो धेरै कफि याट सिभिल मल


कैले पूर्व कैले पश्चिम फेरि रहने प्लान
साँझ कसलाई भेट्ने?साथी या अन्जान
कुराकानी भने सँधै गरियो आकाशे
शायद धेरै छुटे होलान् साथीका बतासे

छोडियो दुईचार बर्थडे अनि पार्टी
सुनियो तिनैका अनेकौ घुर्की
मनले जता तान्यो उतै तिर लागियो
बीचमा केही स्टिक गाँजा नि तानियो

"नभेटेको धेरै भयो" भनि लगाईएका गफ
बहाना मिल्यो फेरि मौसम र ट्राफिक जाम
भेट्छु भनि गरिएका अनेक वाचा
आफै बन्द भए सम्भावनाका ढोका

यसरी बित्यो कति दिन अस्तव्यस्त
एकछिनमा सूर्योदय एकछिनमै सूर्यास्त
कति दिन भो, क्यालेन्डर नि हेर्या छैन
चल्ने जिन्दगी कुद्दैछ, ब्रेक वशमा छैन

* जावेद अख्तरको 'पिछले सात दिनोंमे' बाट एकदमै प्रभावित