भीडमा याद मेटिन्न रै'छ (गजल)

भीडमा याद मेटिन्न रै'छ
भीडमा साथ भेटिन्न रै'छ

कहाँ सकें त्यो दिल तोड्न
आफ्नै घर तोडिन्न रै'छ

आफू हेर्छु मुसुक्क हाँस्छु
ऐनामा आफै देखिन्न रै'छ

अरु रूँदा सम्झाउँथे खूब
आफू दुख्दा हाँसिन्न रै'छ

एक्लै दुख्दा बुझ्दैछ मनले
सबै दुःख बाँडिन्न रै'छ

यता आवोस् कि उता जावोस्
दोबाटोमा अडिन्न रै'छ

फूल सँगै पलाए पनि
काँडा भने ओईलिन्न रै'छ

संसार सँग भिड्न सक्छु म
आफै सँग सकिन्न रै'छ

आजादीको कैदी भएँ म
खुल्ला भई उडिन्न रै'छ

था' भो चित्त दुखेको मेरो
त्यसै गजल लेखिन्न रै'छ

खर्च कति गरिस् एकतारे?
त्यसै ताली पाइन्न रै'छ