गजल नै प्यारो मलाई

मुहार मेरो मुस्कानले रंगाउन प्यारो मलाई ।
पिर वेथा कतिकति लुकाउन प्यारो मलाई ।।

सुख दुख सबैलाई बराबरी भन्छु म त ।
खुशी बाँडी दुःख मात्र बचाउन प्यारो मलाई ।।

ऐश्वर्य भन्नु धन दौलत मात्र हैन मेरो लागी ।
अजम्बरी साथी संगी कमाउन प्यारो मलाई ।।

मनको मेरो उडानमा पुग्न सक्छु जहाँ पनि ।
कल्पनाको घोडाहरू दौडाउन प्यारो मलाई ।।

हृदयमा पलाएको भावना यो कलाकारको ।
गजल बनाई अक्षरमा सजाउन प्यारो मलाई ।।

सबिन सिंह
अगस्ट १८, २०१० बुधवार ।