अलिकति तिमी अलिकति म (गजल - 49)

तिम्रो मेरो बिचको दूरी हामी एक साथ तरौँला
अलिकति तिमी झर्नु अलिकति म चढौँला

लामो यात्रा जीन्दगानी सँग सगै लागौँ हामी
अलिकति तिमी सुस्ताउ अलिकती म लम्कौँला

एक अर्का बिना रैछौँ खाली खाली हामी दुवै
अलिकती तिमी भर्नु अलि धेरै म भरौँला

गाँठो हाम्रो चिसिएमा प्रेमज्वाला सल्काउँला
धेरै धेरै तिमी ताप्नु अलिकति म तापौँला

सारा जग बैरी भए भिड्नु छ है एक भई
अलिकति तिमी आँट्नु अलि धेरै म आँटौला
December 12, 2010